Liberado o mariñeiro Pablo Costas e toda a tripulación do ‘Cobija’

221
benvido pablo

Despois de máis de once meses secuestrado dentro do ‘Cobija’ no porto de Al Mukallah, no Iemen, o mariñeiro de Bueu Pablo Costas Villar foi liberado con toda a tripulación do barco. A situación que atravesaron foi completamente inhumana: un total desamparo legal ante unha acusación de pesca ilegal, fechados nun barco ateigado de ratas e cascudas onde teñen que pasar o seu día a día desde setembro do ano pasado e unha carencia de alimentos que pon en risco a vida destes traballadores. Todo isto nun país inmerso nunha terríbel guerra civil e coa empresa armadora desentendéndose da sua sorte.

A esta situación extrema chegouse tamén coa complicidade do Ministerio español de Asuntos Exteriores, que durante meses non ofreceu ningunha solución. Por todo isto, a mobilización e a unidade popular foi imprescindíbel para conseguir que as administracións se movesen e Pablo Costas volte por fin para a casa.

A loita pola repatriación de Pablo é tamén a loita pola liberdade de todos os tripulantes do ‘Cobija’, de diversas nacionalidades. Todos eles son traballadores que levan a súa vida no mar e que ante unha situación infrahumana de abuso víronse desamparados polas autoridades que se supón deberan velar polos seus dereitos.

Nas últimas semanas a vila de Bueu foi o escenario das protestas que reivindicaban a liberdade de Pablo. No pasado 21 de agosto repartíanse pola vila cartaces e panfletos informativos, e neste sábado 28 de agosto centos de persoas concentrábanse diante da Casa do Concello de Bueu para esixir o seu regreso.

A boa nova non demorou en chegar, e por fin Pablo e o resto da tripulación abandonan o ‘Cobija’ e emprenden camiño cara aos seus lugares de orixe.

Benvido a casa, Pablo!

Só o pobo salva o pobo!