O multiusos de Redondela acolleu unha multitudinaria asemblea de traballadoras e traballadores de Pescanova que lle veñen de dar luz verde á folga como resposta ao enroque patronal. Por unanimidade o martes 14 de marzo e o martes 21 de marzo serán as dúas primeiras xornadas dunha folga que se convertirán en indefinida o 3 de abril.
De nada serviron o medo que a empresa tentou alentar con diversas ameazas públicas ao longo desta semana. Se o medo non venceu é porque as traballadoras e traballadores están a defender un convenio colectivo e non intereses persoais. Hoxe son as traballadoras e traballadores as únicas valedoras da clase traballadora en xeral e do sector en particular nun conflito no que a empresa volve poñer o lucro por riba dos dereitos e das persoas.
A paz social ten un prezo. Ese prezo é un convenio digno sen flexibilidades e categorías de entrada precarias. Se queren paz social que a paguen. Se non a queren están a pedir a FOLGA.
