As traballadoras sociais de Vigo concentráronse este venres diante do Concello desta cidade no inicio dunha serie de mobilizacións para exixir melloras no servizo que atenden e poder así ofrecer un servizo de calidade.
“Demandan un incremento do cadro de persoal que permita cumprir coas ratios legais, establecidas nunha traballadora social por cada 8.000 habitantes. A realidade é que existe unha por cada 17.000 persoas”.
Demandan un incremento do cadro de persoal que permita cumprir coas ratios legais, establecidas nunha traballadora social por cada 8.000 habitantes. A realidade é que existe unha por cada 17.000 persoas.
Critican tamén os escasos 20 minutos fixados para atender cada cita, en moitos casos insuficientes, e a sobrecarga de traballo que as leva acumular expedientes sen darles trámite nos prazos legais establecidos.
Cren imprescindible tamén reducir os tempos de espera das solicitantes para seren atendidas -na actualidade duns dous meses- o que xera situacións dramáticas con persoas en situación de alta vulnerabilidade.
As traballadoras denuncian que tampouco existe persoal administrativo abondo para atender o teléfono ou as propias oficinas.
“A CUT decidiu trasladar á rúa o problema, iniciando unha recollida de signaturas con todas estas demandas e con mobilizacións todos os venres.”
Unha situación cronificada dende hai anos que consideran insostible por máis tempo.
A CUT decidiu trasladar á rúa o problema, iniciando unha recollida de signaturas con todas estas demandas e con mobilizacións todos os venres. O benestar social é cousa de todas e aí estaremos traballando para lograr que cando menos se atenda dun xeito digno.
Por un servizo de calidade!
