CUT Citroën e a Apocalipse Zombie

O TSXG declarou o ERE de Citroën impugnado xudicialmente pola CUT “axustado a dereito”. Este é o punto de partida. Un pronunciamento contrario aos dereitos das traballadores e traballadoras bastante habitual (máis aínda na grande empresa), ou en palabras Vítor Mariño, responsábel da CUT Citroën “cumpriuse o programa”. “Era difícil que David vencese a Goliat”. Ata aquí nada sorprendente. Pero un fallo xudicial que debera ser acollido con preocupación ou, cando menos, con decoro pola representación sindical foi celebrado publicamente polos sindicatos corporativos. Mentres en CCOO se mostraban “satisfeitos cunha sentenza contundente”, UGT chegaba a calificar o exame xudicial do ERE que suspendeu a súa execución como “unha perda de tempo, que impediu executar a saída dos traballadores” da empresa.Dalgunha maneira Citroën representa unha síntese da loita de clases en Galiza. CCOO e UGT preocúpanse abertamente da execución de medidas agresivas aos dereitos do cadro de persoal, en sintonía absoluta coa linguaxe e o discurso empresarial, e a CUT representa o Grande Mal. Isto último deixábao claro un cronista calquera, inepto como o que máis, a toda páxina no Faro de Vigo. Despois de celebrar as vontades da grande industria do automóbil aseveraba “la única sombra la proyecta la CUT que más que colaborar parece boicotear los proyectos de futuro”. Parece pois que coa irrupción da CUT en Citroën deviu a Apocalipso Zombie. Benvida sexa, se serve para salvarnos da súa vida de escravitude asalariada e entrega sindical.