A CUT revalida o seu compromiso contra a precariedade e o desmantelamento en Política Social

222

A CUT duplicou onte a representación que tiña no comité de empresa da Xefatura Territorial da Consellería de Política Social na provincia da Coruña. A candidatura que presentamos no Colexio de Especialistas e Non Cualificados obtivo a confianza maioritaria das traballadoras da Residencia de Maiores de Oleiros, un apoio que agradecemos inmensamente e que nos permite sentar dúas delegadas novas nun comité de empresa de vintecinco membros.

Cartaz dunha concentración de 2017 contra a funcionarización

Agradecemos tamén os votos recibidos de compañeiras doutros centros como Volta do Castro, Porta do Camiño, CAPD Coruña, Torrente, Menores de Ferrol, Caranza e outros lugares máis pequenos e afastados aos que chegaron as mesas itinerantes para permitir o dereito ao sufraxio.

Pola súa banda, as compañeiras e compañeiros da provincia de Pontevedra lanzaron como proposta unha candidatura no Colexio de Técnicos que foi acollida con 35 votos, a piques de atravesar o umbral do 5%, quedando excluídos por unhas décimas de representación. Neste ámbito a CUT reorganizará as súas forzas e dará a cara dende fóra do comité de empresa contra a precarización do público e en defensa dos nosos servizos esenciais.

Malia o recoñecemento da dimensión da nosa representatividade nesta Consellería inmensa, reafirmamos desde a humildade o noso compromiso na loita a prol da recuperación dos dereitos de todas as traballadoras desta administración pública onde a precarización laboral acada límites insoportables e o desmantelamento avanza a velocidade de cruceiro.

O persoal dependente da Consellería de Política Social da Xunta de Galicia e, en consecuencia, os propios servizos, padecen unha situación de crecente precarización á que temos que facerlle fronte. Non imos achantar fronte a presións nin permitir que se dinamiten máis os nosos dereitos. A blindaxe e protección dos postos de traballo, a creación de emprego público de calidade, unha correcta integración do Consorcio Galego de Servizos de Igualdade e Benestar que non prexudique as traballadoras de ningún dos dous entes e garanta os dereitos de todas son algúns dos obxectivos polos que esta central sindical vaille facer unha oposición frontal ao desmantelamento e a desvalorización dos servizos públicos e das condicións laborais do persoal planificadas por parte da Consellería de Política Social.

Seremos fieis ao compromiso programático que construimos entre moitas (traballadoras e traballadores da Consellería de Política Social, afiliadas e simpatizantes da CUT) para o proceso electoral que rematou onte e poñémonos a traballar xa, que está todo por facer.

Grazas! A loita é o único camiño!