Rolda de prensa das Marchas da Dignidade

Rolda de prensa das Marchas da Dignidade

12

 No día de onte tivo lugar na Praza do Obradoiro unha rolda de prensa das organizacións que forman parte das Marchas da Dignidade para anunciar que o vindeiro #29N ocuparán o Obradoiro para esixir pan, traballo e teito.
Na rolda de prensa participaron representantes de moitas das organizacións que adhiren a mobilización convocada polas Marchas da Dignidade para o vindeiro 29 de novembro no Obradoiro co fin de amosar o rexeitamento masivo da clase traballadora galega ás políticas regresivas e a esixencia do seu dereito a unha vida digna.En palabras do Secretario Xeral da CUT, Manolo Camaño: “As reivindicacións que deron lugar á mobilización masiva das Marchas da Dignidade o pasado 22 de marzo seguen hoxe máis vixentes ca nunca. A situación para a clase obreira galega non deixou de empeorar ao longo deste ano e, hoxe como onte, seguimos esixindo Pan, Traballo e Teito”.
“Temos que combater a inxustiza, o desemprego,os desafiuzamentos e os ataques reiterados á clase traballadora galega mediante a mobilización masiva na rúa das clases populares galegas”, engadiu Manolo Camaño, quen advertiu da intención dos xestores do Capital de manter a súa cota de ganancia a costa dos dereitos conquistados pola clase obreira en dous séculos de loita: “Hoxe todo está en perigo. A sanidade e o ensino públicos, as pensións, o dereito a un traballo digno, a un teito e á alimentación, o noso dereito, en definitiva, a ter unha vida digna”, concluíu.
Mobilización do 6 de novembroNa rolda de prensa informaron, así mesmo, da convocatoria dunha manifestación ás 20 horas para o vindeiro 6 de novembro nas principais cidades e vilas do país baixo o lema “Camiñando cara ao 29 de novembro”, co fin de ir sumando forzas e facendo visible na rúa o rexeitamento do pobo galego ás políticas de austeridade impostas pola Troica, Madrid e Feijoo.
Por último, na convocatoria aos medios tamén se informou da presenza da Columna Galega das Marchas da Dignidade en Uvieu o 24 de outubro durante a entrega dos Premios Príncipe de Asturias para amosar o noso rexeitamento á monarquía española.