OS MARIÑEIROS DO MORRAZO COA LOITA DO POBO SAHARAUI

OS MARIÑEIROS DO MORRAZO COA LOITA DO POBO SAHARAUI

12

Un numeroso grupo de mariñeiros da comarca do Morrazo, presentaron publicamente unha iniciativa ós Concellos de Cangas, Marín, Moaña e Bueu, para que os respectivos Plenos das Corporacións adopten acordos de solidariedade coa loita do pobo saharauí e tamén manifestar a repulsa a política xenociada de Marrocos e o papel cómplice do Goberno de España.No escrito presentado por rexistro en todos os concellos da bisbarra, din o seguinte: “Todos os comparecentes somos mariñeiros que durante moitos anos trabállanos no caladoiro do Banco Canario-Sahariano. O motivo deste escrito é exercer a nosa obriga ética e de agradecemento ó pobo saharauí, que pensamos é compartida pola inmensa maioría de mariñeiros do Morrazo que durante corenta anos faenamos naquelas augas.  

 

 Diante dos dramáticos acontecementos que se están a suceder nos últimos tempos nos territorios ocupados do Sáhara Occidental e a súa poboación. Dirixímonos a todos os Grupos Municipais dos Concellos do Morrazo, para que nos respectivos Plenos Municipais máis próximos traten como Moción o presente escrito:

 

1º.- Manifestar a nosa enérxica repulsa contra a política xenocida da Monarquía marroquí, que non dubida empregar os métodos máis desapiadados de terrorismo de estado para someter a poboación saharauí en loita polos seus lexítimos dereitos.

 

2º.- Transmitir así mesmo, a nosa enérxica repulsa ó Goberno español, a súa Ministra de Asuntos Exteriores pola súa política vergonzosa sobre a “cuestión saharauí” actuando como verdadeiros cómplices da Monarquía marroquí.

 

3º.- Manifestar a nosa máis amplía solidariedade e apoio ó Goberno da República Árabe Saharauí Democrática e o pobo saharauí, se cabe especialmente á poboación dos territorios ocupados.

 Solicitamos que os respectivos Acordos Plenarios en repulsa da actuación da Monarquía marroquí, da actitude cómplice do Goberno español, e de solidariedade co pobo saharauí, sexan enviados polo conducto regulamentario, á Presidencia do Goberno Español, á Ministra de Asuntos Exteriores, ás Delegacións Saharauís en Madrid e Galicia, ó Goberno Saharauí en Tindouf, e a Embaixada de Marrocos en Madrid.

 

En roda de prensa celebrada en Cangas, os mariñeiros que xa na longa loita que precedeu á desaparición da flota galega no caladoiro do Sahara 1988-2000,estableceron fértiles lazos solidarios co pobo saharauí, lembraron que a comarca e o desenvolvemento da súa economía dos últimos corenta anos, sería impensable sen o factor da pesca naquel caladoiro.

  Comprometéronse a asistir os Plenos de cada un dos Concellos e transmitir a cada un dos Grupos Municipais esta iniciativa solidaria, para facer que prospere en cada un dos Concellos.